റിയാദ്: സൗദി അറേബ്യ സന്ദര്‍ശിക്കുന്ന കെ സുധാകരന്‍ എം പി ക്ക് റിയാദില്‍ പയ്യന്നൂര്‍ സൗഹൃദ വേദി ഉജ്ജ്വല സ്വീകരണം നല്‍കി. കുടുംബ സമേതം പയ്യന്നൂര്‍ സൗഹൃദ വേദിയുടെ ആഥിത്യം സ്വീകരിച്ചെത്തിയ കെ സുധാകരനെയും ഭാര്യ സ്മിത ടീച്ചറെയും കാണാന്‍ പെട്ടെന്ന് പ്ലാന്‍ ചെയ്യ്ത പരിപാടിയായിട്ടു കൂടി വന്‍ ജനക്കൂട്ടമാണ് എത്തിയത്‌. ലേ റോയല്‍ റെസ്റ്റോറന്റ് ഹാളില്‍ വെച്ചു നടന്ന സ്വീകരണ പരിപാടിയില്‍ ജനറല്‍ കണ്‍വീനര്‍ ബ്രിജേഷ് സ്വാഗതം പറഞ്ഞു. കണ്ണൂര്‍ എയര്‍ പോര്‍ട്ടിന്‍റെ പ്രവര്‍ത്തനം ത്വരിതഗതിയില്‍ നടത്താന്‍ അഭ്യര്‍ത്ഥിച്ചുകൊണ്ടുള്ള വേദിയുടെ നിവേദനം കെ പി അബ്ദുള്‍ മജീദ്‌ എം പിക്ക്‌ സമര്‍പ്പിച്ചു.
ജനറല്‍ സെക്രട്ടറി കെ എം സനൂപ്‌ കുമാര്‍ പയ്യന്നൂര്‍ സൗഹൃദ വേദി എന്ന ആഗോള കൂട്ടായ്മയെ പരിചയപ്പെടുത്തി സംസാരിച്ചു. വേദി രക്ഷാധികാരി ഡോക്ടര്‍ രാജ്മോഹന്‍ അദ്ദേഹത്തെ പയ്യന്നൂര്‍ ഖാദി കൊണ്ടുള്ള പൊന്നാട അണിയിച്ച് കൊണ്ട് ആദരിച്ചു.
തുടര്‍ന്ന് സംസാരിച്ച കെ സുധാകരന്‍റെ ഓരോ പ്രസ്താവനകളും തിങ്ങി നിറഞ്ഞ സദസ്സ് വന്‍ കൈയ്യടിയോട്കൂടിയാണ് സ്വീകരിച്ചത് . ഇന്ത്യന്‍ ദേശീയ സ്വാതന്ത്ര്യ സമരത്തില്‍ പയ്യന്നൂരിന് നിര്‍ണായക പങ്കാനുള്ളതെന്നും പയ്യന്നൂര്‍ക്കരുടെ കൂട്ടായ്മ ഗള്‍ഫില്‍ ഉടനീളം ഉണ്ടെന്ന് അറിഞ്ഞതില്‍ അതിയായ സന്തോഷമുണ്ടെന്ന് അദ്ദേഹം പറഞ്ഞു. 2015 ഓടെ കണ്ണൂര്‍ എയര്‍ പോര്‍ട്ടില്‍ ഒരു വിമാനമെങ്കിലും പറന്നുയരുമെന്നു അദ്ദേഹം ഉറപ്പ്‌ നല്‍കി.അത് പോലെ അഴീക്കല്‍ തുറമുഖം പൂര്‍ത്തിയാക്കുന്ന കാര്യത്തിലും സംശയം വേണ്ടെന്നു അദ്ദേഹം പറഞ്ഞു.

റിയാദിലെ വ്യവസായ പ്രമുഖനായ സൂരജ്‌ കുമാര്‍, ഡോക്ടര്‍ രാജ് മോഹന്‍, ഗോപിനാഥ് സംസാരി , വിനോദ് വേങ്ങയില്‍ തുടങ്ങിയവര്‍ സംസാരിച്ചു. ബാബു ഗോവിന്ദ്‌, ഷംസുദ്ദീന്‍ ചീമേനി, ജയപ്രകാശ്‌ വെള്ളൂര്‍, ഹരീന്ദ്രന്‍ കെ, ശിഹാബുദ്ദീന്‍ തുടങ്ങിയവര്‍ പരിപാടി സംഘടിപ്പിക്കുന്നതിനു നേതൃത്വം നല്‍കി.

റിയാദ്‌: കര്‍മ്മനൈരന്തര്യത്തിന്റെയും ജീവിതവിശുദ്ധിയുടെയും ആള്‍രൂപമായിരുന്ന റിയാദിലെ മലയാളി സമൂഹം ആദരവോടെ രാജേട്ടന്‍ എന്ന് വിളിച്ചിരുന്ന കെ.എസ് രാജന്‍റെ ഓര്‍മ്മക്കായി പയ്യന്നൂര്‍ സൗഹൃദ വേദി ഏര്‍പ്പെടുത്തിയ “കെ എസ് രാജന്‍ പുരസ്കാരം” പയ്യന്നൂര്‍ സൗഹൃദ വേദി റിയാദില്‍ വിളിച്ചു ചേര്‍ത്ത വാര്‍ത്താ സമ്മേളനത്തില്‍ വേദിയുടെ രക്ഷാധികാരി ഡോക്ടര്‍ ഭരതന്‍ പ്രഖ്യാപിച്ചു.
മാധ്യമ-ജീവ കാരുണ്യ രംഗത്ത്‌ മികച്ച സേവനങ്ങള്‍ നല്‍കുന്ന വ്യക്തിക്കോ സംഘടനക്കോ ആണ് ഈ പുരസ്കാരം നല്‍കുന്നത്. പ്രമുഖ പത്ര പ്രവര്‍ത്തകനും സിനിമാ കഥാകൃത്തും സാമൂഹ്യ പ്രവര്‍ത്തകനുമായ കെ യു ഇക്ബാലാണ് പ്രഥമ “കെ എസ് രാജന്‍ പുരസ്കാരത്തിനു അര്‍ഹമായത്.


കഴിഞ്ഞ 11 വര്‍ഷങ്ങളായി കേരളത്തിനു വെളിയിലെ ആദ്യത്തെ മലയാള ദിന പത്രമായ മലയാളം ന്യൂസിന്റെ റിയാദിലെ സ്റ്റാഫ്‌ റിപ്പോര്‍ട്ടരാണ് കെ യു ഇക്ബാല്‍. മലയാളി സമൂഹം അനുഭവിക്കുന്ന നിരവധി സാമൂഹ്യ പ്രശ്നങ്ങള്‍ പൊതു സമൂഹത്തിന്‍റെ മുന്നില്‍ കൊണ്ടുവന്നു സാമൂഹ്യ പ്രതിബദ്ധതയോടെ പ്രശ്ന പരിഹാരത്തിന് ശ്രമിക്കുന്ന കെ യു ഇക്ബാലിന്റെ സേവനങ്ങള്‍ വിലമതിക്കാനാവാത്തതാണ്. ഇടയ വിലാപങ്ങള്‍ , ഗദ്ധാമ, ബസ്മ, യാന പാത്രം തുടങ്ങി നിരവധി സാഹിത്യ സൃഷ്ടികള്‍ അദ്ദേഹത്തിന്റെതാണ്. മാതൃഭൂമി ആഴ്ചപ്പതിപ്പ്, ഭാഷാപോഷിണി, മാധ്യമം തുടങ്ങിയ മുഖ്യധാര പ്രസിദ്ധീകരണങ്ങളില്‍ അദ്ദേഹത്തിന്റെ കൃതികള്‍ പ്രസിദ്ധീകരിച്ചിട്ടുണ്ട്. പ്രശസ്ത മലയാള സംവിധായകന്‍ ശശി പറവൂര്‍ സംവിധാനം ചെയ്യുന്ന പുതിയ ചിത്രത്തിന്റെ കഥ കെ യു ഇക്ബാലിന്റെതാണ്. അതു കൂടാതെ രാജേട്ടന്റെ കുടുംബവുമായി അടുത്ത ആത്മബന്ധം പുലര്‍ത്തുന്ന വ്യക്തികൂടിയാണ് കെ യു ഇക്ബാല്‍.



ഫെബ്രുവരി 16 വ്യാഴാഴ്ച 8 മണിക്ക് ഹാഫ് മൂണ്‍ റെസ്റ്റോറന്റ് ഹാളില്‍ വെച്ചു നടത്തുന്ന കെ എസ് രാജന്‍ അനുസ്മരണ ചടങ്ങില്‍ വെച്ചു പുരസ്കാരം സമ്മാനിക്കുന്നതായിരിക്കും. റിയാദിലെ പ്രമുഖ മാധ്യമ, സാംസ്കാരിക, സാമൂഹിക പ്രവര്‍ത്തകരും ബിസിനസ്‌ രംഗത്തെ പ്രമുഖരും ഈ ചടങ്ങില്‍ പങ്കെടുക്കുന്നതാണ്. ചടങ്ങില്‍ വെച്ചു നോര്‍ക്ക റൂട്ട്സ്‌ കണ്‍സല്‍ട്ടന്ട്ടായ ശിഹാബ്‌ കൊട്ടുകാടിനെയും അക്ഷയ ഗ്ലോബല്‍ പുരസ്കാരം നേടിയ ഡോക്ടര്‍ ഭരതനെയും ആദരിക്കുന്നതാണ്.



പത്ര സമ്മേളനത്തില്‍ റിയാദിലെ പ്രമുഖ മാധ്യമ പ്രവര്‍ത്തകരായ നാസര്‍ കാരന്തൂര്‍ (ഏഷ്യാനെറ്റ്‌), നാസര്‍ കാരക്കുന്ന് (കൈരളി) , ബഷീര്‍ പാങ്ങോട്‌ (ജീവന്‍), നരേന്ദ്രന്‍ (അമൃത), നജീം കൊച്ചുകലുങ്ക് (മാധ്യമം), കെ യു ഇഖ്‌ബാല്‍ (മലയാളം ന്യൂസ്‌), അഷ്‌റഫ്‌ (തേജസ്‌), ഉസ്മാന്‍ (ചന്ദ്രിക) തുടങ്ങിയവര്‍ പങ്കെടുത്തു. പയ്യന്നൂര്‍ സൗഹൃദ വേദിയെ പ്രതിനിധീകരിച്ച് രക്ഷാധികാരി ഡോക്ടര്‍ ഭരതന്‍, ഡോക്ടര്‍ രാജ് മോഹന്‍, അഡ്വക്കേറ്റ് സുരേഷ് എം പി (പ്രസിഡന്റ്‌), സനൂപ്‌ കുമാര്‍ (ജനറല്‍ സെക്രട്ടറി), കെ പി അബ്ദുല്‍ മജീദ്‌ , മധുസൂദനന്‍ പി കെ എന്നിവര്‍ സംസാരിച്ചു.